Благодарственный молебен Святителю Луке Крымскому и Симферопольскому

Царю Небесный, Утешителю, Душе Истины, Иже везде сый, и вся исполняяй, Сокровище благих, и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Бог Господь и явися нам благословен грядый во имя Господне. ( 4 раза )

Тропарь, глас 4:

Благодарни суще недостойнии раби Твои, Господи, / о Твоих великих благодеяниих на нас бывших, / славяще Тя хвалим, благословим, благодарим, поем, и величаем Твое благоутробие / и рабски любовию вопием Ти: // Благодетелю Спасе наш, слава Тебе.

Тропарь,глас 3:

Твоих благодеяний, и даров туне / яко раби непотребнии сподобльшеся Владыко / к Тебе усердно притекающе, благодарение по силе приносим, / и Тебе яко благодетеля и Творца Славяще, вопием // слава Тебе, Боже прещедрый.

Слава Отцу, и Сыну, и Святому Духу

Тропарь святителю Луке

Возвестителю пути спасительного, /исповедниче и архипастырю Крымския земли, / истинный хранителю отеческих преданий, / столпе непоколебимый, Православия наставниче, / врачу богомудрый, святителю Луко, / Христа Спаса непрестанно моли / веру непоколебиму православным даровати / и спасение, и велию милость.

И ныне, и присно, и во веки веков. Аминь.

Богородице Дево, радуйся, Благодатная Марие, Господь с Тобою; благословенна ты в женах и благословен плод чрева Твоего, яко Спаса родила если душ наших.

Запевы...

Прокимен глас 4-й: Воспою Господеви благодеявшему мне, и пою имени Господа Вышняго.

Стих: Возрадуется сердце мое о спасении твоем.

Евангелие от Луки:

Входя́щу же емý в некую вéсь, сретóша егó дéсять прокажéнных мужéй, и́же стáша издалéча: и тии вознесóша глáс, глагóлюще: Иисýсе настáвниче, поми́луй ны́. И ви́дев речé и́м: шéдше покажи́теся свящéнником. И бы́сть идýщым и́м, очи́стишася. Еди́н же от ни́х, ви́дев, я́ко исцеле, возврати́ся, со глáсом вéлиим слáвя Бóга, и падé ни́ц при ногý егó, хвалý емý воздая́: и тóй бе самаряни́н. Отвещáв же Иисýс речé: не дéсять ли очи́стишася? да дéвять где? кáко не обретóшася возврáщшеся дáти слáву Бóгу, тóкмо иноплемéнник сéй? И речé емý: востáв иди́: вера твоя́ спасé тя. (Луки 17:12-19).

Запевы…

Достойно есть, яко воистинну, блажити Тя, Богородицу, Присноблаженную и Пренепорочную, и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

Сугубая ектения: Господи помилуй ( трижды )

Молитва.

Песнь святителя Амвросия Медиоланского

Тебе, Бога хвалим / Тебе, Господа исповедуем, / Тебе Превечнаго Отца, вся земля величает. / Тебе вси ангели, / Тебе небеса, и вся силы. / Тебе херувимы и серафимы  непрестанными гласы взывают / свят, свят, свят Господь Бог Саваоф. / Полны суть небеса и земля величества славы Твоея. / Тебе преславный апостольский лик, / Тебе пророческое хвалебное число, / Тебе хвалит пресветлое мученическое воинство. / Тебе по всей вселенней исповедует Святая Церковь / Отца непостижимаго величества / покланяемаго Твоего истиннаго и единороднаго Сына, / и Святаго Утешителя Духа. /

Ты Царю славы, Христе / Ты Отца присносущный Сын еси. / Ты ко избавлению приемля человека, / не возгнушался еси девическаго чрева. / Ты, одолев смерти жало / отверзл еси верующим Царство Небесное. / Ты одесную Бога седиши  во славе Отчей, / судия приити веришися. /

Тебе убо просим / помози рабом Твоим, / ихже честною кровию искупил еси, / сподоби со святыми Твоими в вечной славе Твоей царствовати. / Спаси люди Твоя Господи / и благослови  достояние Твое, / исправи их, и вознеси их во веки, / во вся дни благословим Тебе, / и восхвалим имя Твое во век, и в век века. / Сподоби, Господи, в день сей без греха сохранитися нам, / помилуй нас, Господи, помилуй нас. / Буди милость Твоя, Господи на нас / якоже уповахом на Тя. / На Тя, Господи, уповахом, // да не постыдимся во веки, аминь.

Молитва Святителю Луке

   О всеблаженный исповедниче, святителю отче наш Луко, великий угодниче Христов! Со умилением приклоньше колена сердец наших, и припадая к раце честных и многоцелебных мощей твоих, якоже чада отца молим тя всеусердно: услыши нас грешных и принеси молитву нашу к милостивому и человеколюбцу Богу, Емуже ты ныне в радости святых и с лики Ангел предстоиши. Веруем бо, яко ты любиши ны тою же любовию, еюже вся ближния возлюбил еси, пребывая на земли.

   Испроси у Христа Бога нашего: да утвердит во святей своей Православней Церкви дух правыя веры и благочестия, пастырям ея да даст святую ревность и попечение о спасении вверенных им людей: право верующия соблюдати, слабыя и немощныя в вере укрепляти, неведущия наставляти, противная обличати. Всем нам подай дар коемуждо благопотребен, и вся яже к жизни временней и к вечному спасению полезная. Градов наших утверждение, земли плодоносие, от глада и пагубы избавление. Скopбящим утешение, недугующим исцеление, заблудшим на путь истины возвращение, родителем благословение, чадом в страсе Господнем воспитание и научение, сирым и убогим помощь и заступление. Подаждь нам всем твое архипастырское и святое благословение, да тобою осеняеми избавимся от козней лукаваго и избегнем всякия вражды и нестроений, ересей и расколов.

   Даруй нам богоугодно прейти поприще временней жизни, настави нас на путь, ведущий в селения праведных, избави нас воздушных мытарств и моли о нас всесильнаго Бога: да в вечней жизни с тобою непрестанно славим Отца и Сына и Святаго Духа, Емуже подобает всякая слава, честь и держава во веки веков. Аминь.